देशभर राजसंस्थाको पुनर्बहालीको माग गर्दै प्रदर्शन भइरहेका बेला मोरङको उर्लाबारीमा पनि गणतन्त्रविरोधी आन्दोलन भएको छ। राष्ट्रिय प्रजातन्त्र पार्टी (राप्रपा) उर्लाबारी नगर समिति, नागरिक बचाउ अभियान, र ॐ कार उर्लाबारी परिवारको आयोजनामा बिहीबार साँझ विरोध प्रदर्शनसहित राँके जुलुस निकालिएको हो ।

बरगाछी चोकबाट सुरु भएको जुलुस उर्लाबारीको मुख्य चोकमा पुगेर सभामा परिणत भएको थियो ।सहभागीहरूले “गणतन्त्र मुर्दावाद!”, “राजसंस्था पुनःस्थापना गर!”, “श्री ५ ज्ञानेन्द्र जिन्दाबाद!”, जस्ता नारा लगाउँदै राजसंस्थाको पक्षमा आवाज उठाएका थिए ।

प्रदर्शनका क्रममा प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा, र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ को तस्वीर समेत जलाइएको थियो।

उनीहरूले वर्तमान राजनीतिक नेतृत्वप्रति असन्तोष व्यक्त गर्दै गणतन्त्र असफल भइसकेको तर्क गरेका थिए।

साँझ सम्पन्न सो कार्यक्रमको नेतृत्व नागरिक बचाउ अभियानका अभियन्ता समिर केसीले गरेका थिए भने व्यवस्थापन राप्रपा उर्लाबारी नगर समितिले गरेको थियो।